Հանուն առողջ ապրելակերպի

ՀՀ առողջապահության նախարար Դերենիկ Դումանյանի հետ այսօր տեղի ունեցած հանդիպման ժամանակ Վորլդ Վիժն Հայաստանի տնօրեն Ժիրայր Էդիլյանը ներկայացրեց կազմակերպության գործունեության 25 տարիների ընթացքում իրականացված ծրագրերը։

Նշեց, որ 1988-ի աղետալի երկրաշարժից հետո հումանիտար օգնության նպատակով Հայաստան եկած կազմակերպությունը անցած տարիների ընթացքում լայնածավալ ու բազմազան զարգացման ծրագրեր է իրականացնում։ Սկսելով Գյումրիից, Վորլդ Վիժն Հայաստանն այժմ աշխատում է 6 մարզերի ավելի քան 200 համայնքում` աջակցելով խոցելի խմբում գտնվող ավելի քան 33 հազար երեխաների։

Առողջապահության ոլորտում իրականացվող ծրագրերի քննարկման ժամանակ երկուստեք կարևորվեցին երկրում առողջ ապրելակերպի ներդրմանն ուղղված միջոցառումներն ու առաջիկա ծրագրերը։

«Առողջ ապրելակերպի ներդրումը հանրապետության նախագահի նախընտրական ծրագրի դրույթներից մեկն է, և առաջիկայում մեծ աշխատանք ենք նախատեսում կատարել։ Կարևորելով գաղափարը` պետությունը 2014-ի բյուջեում այդ նպատակով առաջին անգամ միջոցներ է նախատեսել։ Նախարարության մասնագետներն արդեն մշակել են «Առողջ ապրելակերպի մասին» հայեցակարգը, որում արտացոլված է ծրագրի քաղաքականությունն ու փիլիսոփայությունը։ ՀՀ կառավարության հավանությանն արժանանալուց հետո դրան կհաջորդեն բազմաթիվ օրենսդրական և ենթաօրենսդրական ակտեր։

Այս ուղղությամբ լայնածավալ աշխատանքներ ենք տանելու թե՛ տեղական ինքնակառավարման մարմինների, թե՛ հասարակական կազմակերպությունների  և բոլոր նրանց հետ, ովքեր շահագրգռված են մեր հանրության առողջության պահպանման հարցերով։  Եվ շատ ուրախ եմ, որ Վորլդ Վիժնն այստեղ ևս մեր կողքին է»,- ասաց նախարարը։

Հստակեցվեցին դեկտեմբերի վերջին առողջ ապրելակերպի խթանմանը նվիրված գիտաժողովի համատեղ կազմակերպման մանրամասները։
Հանդիպման ընթացքում նախարարը ներկայացրեց վերջին շրջանում ոլորտում իրականացվող բարեփոխումները։ Խոսելով բժշկական օգնության որակի վերահսկման ուղղությամբ տարվող աշխատանքների մասին` նախարարը Վորլդ Վիժն Հայաստանի առողջապահական ծրագրերի ղեկավար Նաիրա Ղարախանյանին առաջարկեց ընդգրկվել այդ նպատակով ձևավորվող հանձնաժողովում, ինչն ընդունվեց մեծ պատրաստակամությամբ։

Հանդիպման ժամանակ երկուստեք կարևորվեց հետագա համագործակցությունը։

Հարցեր, պատասխաններ, մեկնաբանություններ